தமிழகத்தில் தஞ்சாவூர், அரவக்குறிச்சி மற்றும் திருப்பரங்குன்றம் ஆகிய தொகுதிகளுக்கு இடைத்தேர்தல் வரும் நவம்பர் 19 ஆம் தேதி நடைபெறவுள்ளது. திருப்பரங்குன்றம், தஞ்சை மற்றம் அரவக்குறிச்சி ஆகிய தொகுதிகளில் அதிமுக வேட்பாளர்கள் வேட்புமனு தாக்கல் செய்தனர்.

இந்த வேட்பாளர்களுக்கு, கட்சியின் சின்னமான இரட்டை இலை சின்னம் ஒதுக்குவதற்காக அதிமுக தலைமைக் கழகத்திலிருந்து படிவம் பி வழங்கப்பட்டுள்ளது. இந்த படிவத்தில் அதிமுகவின் பொதுச் செயலாளரும் முதலமைச்சருமான ஜெயலலிதாவின் கையெழுத்துக்குப் பதில் இடது கையின் பெருவிரல் ரேகை பதிவு(27-10-2016) செய்யப்பட்டுள்ளது.

மேலும் படிவம் பி-ல் ஜெயலலிதாவின் கையெழுத்து இல்லை.அதற்குப் பதிலாக அவருடைய விரல் ரேகை பதிக்கப்பட்டு இருக்கிறது என்று ராஜிவ் காந்தி அரசு மருத்துவமனையின் பேராசிரியர் பி. பாலாஜி, இதற்கு ஒப்புதல் அளித்து இருக்கிறார்.

முதல்வர் ஜெயலலிதாவின் உடல்நலம் தேறி வருவதாகவும் விரைவில் வீடு திரும்புவார் என்று செய்திகள் வருகின்றன. ஆனால், கையெழுத்துப் போட முடியாமல் கை ரேகை பதிவு செய்யும் நிலையில்தான் முதலமைச்சரின் உடல்நலம் நீடிக்கிறதா என சமூக ஊடகங்களில் மக்கள் சந்தேகம் எழுப்பிவருகின்றனர்.