அறிவியல் தமிழறிஞர் மணவை முஸ்தபா உடல் நலக்குறைவால் திங்கள்கிழமை(6-2-2017) உயிரிழந்தார். அவருக்கு வயது 82.

அறிவியல் தமிழ் வளர்ச்சியில் தம்மை முழுமையாக ஈடுபடுத்தி கொண்டவர் தமிழறிஞர் மணவை முஸ்தபா.  அறிவியல், தொழில்நுட்பம், மருத்துவம், கணினி துறைச் சார்ந்த 8 கலைச் சொல் அகராதிகளை வெளியிட்டுள்ளார்.

கடந்த சில மாதங்களாக உடல் நலக்குறைவால் பாதிக்கப்பட்டிருந்த மணவை முஸ்தபா சென்னையில் காலமானார். இதனையடுத்து சென்னையில் உள்ள அவரது இல்லத்தில் வைக்கப்பட்டுள்ள அவரின் உடலுக்கு அரசியல் கட்சியினர், தமிழ் அறிஞர்கள் உள்ளிட்டோர் மாலை அணிவித்து அஞ்சலி செலுத்தினர்.

தமிழக அரசின் கலைமாமணி உள்ளிட்ட சுமார் 40க்கும் மேற்பட்ட விருதுகளை பெற்றுள்ள அறிஞர் முஸ்தபா, சுமார் 8 லட்சம் அறிவியல் தமிழ் கலைச் சொற்களை உருவாக்கியுள்ளார்.

31 நூல்களை எழுதியுள்ள மணவை முஸ்தபா, 7 நூல்களை ஆங்கிலத்தில் இருந்தும், 3 நூல்களை மலையாளத்தில் இருந்தும் தமிழில் மொழி பெயர்த்துள்ளார். யுனெஸ்கோ கூரியர் இதழ் தமிழ்ப் பதிப்பின் ஆசிரியராக 35 ஆண்டுகாலம் பணியாற்றினார்.

என்சைக்ளோபீடியா பிரிட்டானிகா களஞ்சியம் தமிழ்ப் பதிப்பின் பொறுப்பாசிரியராகத் திகழ்ந்து சிறப்பாக வெளிகொணர்ந்தார். எம்.ஜி.ஆர்., மு. கருணாநிதி, ஜெ. ஜெயலலிதா ஆகிய மூன்று முதல்வர்களால் 5 விருதுகள் அளிக்கப்பெற்று பாராட்டப்பட்ட ஒரே தமிழறிஞர் மணவை முஸ்தபா என்று புகழாரம் சூட்டியிருக்கிறது நியூஸ் 7 தமிழ்.

தமிழறிஞர் மணவை முஸ்தபா மறைவுக்கு அரசியல் கட்சித் தலைவர்கள் இரங்கல் தெரிவித்துள்ளனர்.

பாமக நிறுவனர் ராமதாஸ் விடுத்துள்ள இரங்கல் அறிக்கை:
அறிவியல் தமிழறிஞர் மணவை முஸ்தபா அவர்கள் உடல் நலக்குறைவு காரணமாக சென்னையில் இன்று காலமானார் என்ற செய்தி கேட்டு பெரும் அதிர்ச்சியும், வேதனையும், துயரமும் அடைந்தேன்.
தமிழுக்கும் அறிவியலுக்கும் ஒரே நேரத்தில் மணவை முஸ்தபா அவர்களுக்கு இணையான பங்களிப்பு செய்தவர்கள் யாருமில்லை. தமிழை செம்மொழியாக்க முஸ்தபா மிகக் கடுமையாக உழைத்தார். இதற்காக பல்வேறு யோசனைகளை தமிழக அரசுக்கு மணவை முஸ்தபா அவர்கள் தான் வழங்கினார்.
அறிவியல், மருத்துவம், பொறியியல் சார்ந்த ஏராளமான நூல்களை இவர் பிறமொழிகளில் இருந்து தமிழில் மொழி பெயர்த்துள்ளார். எனக்கு மிகவும் நெருங்கிய நண்பராக விளங்கினார். கடந்த 2005-ஆம் ஆண்டு பொங்கு தமிழ் வளர்ச்சி அறக்கட்டளை சார்பில் பாட்டாளி மக்கள் கட்சியைச் சேர்ந்த இளைஞர்களுக்கு சங்க தமிழ் மற்றும் மொழிப் போராட்டம் பற்றி தொடர் பயிற்சி வகுப்பு நடத்தப்பட்டது. மொத்தம் 8 வாரங்கள் நடைபெற்ற பயிற்சி வகுப்பின் நிறைவு விழா 27.03.2005 அன்று நடைபெற்றது.
அதில் மணவை முஸ்தபா அவர்களை சிறப்பு விருந்தினராக அழைத்து தமிழ் மொழியில் சிறப்புகள், ஆற்றல்கள் குறித்து விளக்கச் செய்ததுடன், தமிழ் இலக்கியம், பிழையின்றி தமிழ் பேசுவது குறித்தும் பயிற்சி அளிக்கச் செய்தேன். இதில் பயிற்சி பெற்ற அனைவருக்கும் மனவை முஸ்தபா அவர்கள் எழுதிய தூய தமிழ் சொற்கள் அடங்கிய நூலை அனைவருக்கும் பரிசாக வழங்கினேன். தமிழ் மொழி வளர்ச்சி குறித்து மணவை முஸ்தபா அவர்கள் என்னுடன் பலமுறை விவாதித்திருக்கிறார்.
மணவை முஸ்தபா அவர்களின் மறைவு அறிவியலுக்கும், தமிழுக்கும் ஈடு செய்ய முடியாத இழப்பு ஆகும். அவரை இழந்து வாடும் குடும்பத்தினருக்கும், நண்பர்களுக்கும், தமிழறிஞர்களுக்கும் பாட்டாளி மக்கள் கட்சி சார்பில் எனது ஆழ்ந்த இரங்கலையும் அனுதாபத்தையும் தெரிவித்துக் கொள்கிறேன்.
மனிதநேய மக்கள் கட்சியின் தலைவர் பேராசிரியர் எம்.எச்.ஜவாஹிருல்லா வெளியிட்ட இரங்கல் அறிக்கை:
மணவை முஸ்தபா அவர்கள் ஒரு சிறந்த தமிழ் அறிஞராக விளங்கியவர். லட்சக்கணக்கான கலைச் சொற்களை தமிழுக்குத் தந்தவர். ஒரு பல்கலைக்கழகம் செய்ய வேண்டிய பணியை தனி ஒரு மனிதராக நிறைவேற்றியவர். கணினி, அறிவியல், பொருளாதாரம் என பல்வேறு துறைகளிலும் பயன்படுத்தக்கூடிய ஆங்கிலச் சொற்களை தமிழில் எவ்வாறு பயன்படுத்த வேண்டும் என மொத்தம் எட்டு தொகுதிகளாக அவர் வெளியிட்ட அகராதி, மிகவும் சிறப்பிற்குரியது.தமிழ்மொழிக்கு செம்மொழி அந்தஸ்து கிடைப்பதற்கு அவரது முன்முயற்சிகளும், ஆய்வுகளும் பெரிதும் உதவின.
எனது மாணவப் பருவம் முதலே மணவை முஸ்தபா நடத்திய பல்வேறு நிகழ்ச்சிகளில் நான் பங்கெடுத்துள்ளேன். குறிப்பாக, மீரா பவுண்டேஷன் என்ற பெயரில் அவர் நடத்திய இஸ்லாமியத் தமிழ் இலக்கியங்கள் குறித்து தொடர் சொற்பொழிவுகள் சென்னை மண்ணடியில் நடத்திவந்தது மிகவும் சிறப்பிற்குரியது.
பல்வேறு தமிழ் அறிஞர்கள் குறிப்பாக சிலம்பொலி செல்லப்பனார் போன்றவர்களுக்கு தமிழ் இஸ்லாமியக் காப்பியங்கள் வாயிலாக இஸ்லாத்தைப் பற்றிய அறிமுகமும், இஸ்லாத்தைப் பற்றிய ஆய்வும் செய்ய பெரிதும் காரணமானவர் மணவை முஸ்தபா என்பதை நான் இங்கு நினைவு கூறுகின்றேன். எனது மாணவப் பருவத்திலே தொலைக்காட்சி இல்லாத அக்காலக் கட்டத்தில் சர்வதேச அளவில் நடக்கும் நிகழ்வுகளை ஆங்கிலத்திலிருந்து தொகுத்து தமிழில் யுனெஸ்கோ கூரியர் என்ற தமிழ் இதழ் மூலம் வெளியிட்டு விழிப்புணர்வை ஏற்படுத்தியவர் மணவை முஸ்தபா அவர்கள்.
மருத்துவம், இயற்பியல், தொழில்நுட்பம், வாகனஇயல் என உயிர்காப்பு மருந்து முதல் உதிரி பாகங்கள் வரை எல்லாவற்றுக்குமே தமிழ் பெயர்கள் இருக்க வேண்டும் என பேராவல் கொண்டவர் மணவை முஸ்தபா அவர்கள். நமது சமகாலத்தில் செம்மொழியாம் தமிழ்மொழிக்கு, மற்ற மொழிகளுடன் ஒப்பிடும்போது தமிழில் அறிவியல் சொற்கள் நிறைந்து காணப்படக்கூடிய வகையில் தமிழை செழுமைப் படுத்தியதற்கு மணவை முஸ்தபா அவர்கள் பெரிதும் காரணமாக இருந்தார். அவருடைய இழப்பு தமிழ்பேசும் நல்லுலகத்திற்கு மாபெரும் இழப்பாகும்.
மணவை முஸ்தபா அவர்களை இழந்து வாடும் அவரது குடும்பத்தினருக்கும் நண்பர்களுக்கும் மனிதநேய மக்கள் கட்சியின் சார்பாக எனது ஆழ்ந்த இரங்கலைத் தெரிவித்துக் கொள்கிறேன். இறைவன் மறுமையில் அவருக்கு உயர்ந்த சுவனத்தை வழங்க பிரார்த்திக்கிறேன்.

அறிஞர் பெருந்தகை மணவை முஸ்தபா தமிழுக்குத் தொண்டு ஆற்றிய தனி ஒருவர்

வைகோ புகழ் அஞ்சலி

அறிவியல், தொழில்நுட்பம், மருத்துவம், கணினி ஆகிய துறைகளில் பல்லாயிரக்கணக்கான புதிய தமிழ்ச் சொற்களை ஆக்கித் தந்து, தமிழ் மொழியை அடுத்த கட்டத்திற்கு நகர்த்துவதில் தன்னிகர் இல்லாத் தொண்டு ஆற்றிய அறிஞர் பெருந்தகை மணவை முஸ்தபா அவர்கள் இயற்கை எய்தினார் என்ற செய்தி அறிந்து அதிர்ச்சியும், வேதனையும் அடைந்தேன்.

நீண்ட காலம் அவர் ஆசிரியராகப் பொறுப்பு வகித்த யுனெஸ்கோ கூரியர் இதழ்களைப் படித்து வியந்து இருக்கின்றேன். தொலைக்காட்சிகள் இல்லாத அந்த நாள்களில், உலகின் மூலை முடுக்குகளில் இருந்தெல்லாம் புதிய செய்திகளைத் தமிழுக்குக் கொண்டு வந்து சேர்த்த அந்த இதழை விரும்பி படித்து இருக்கின்றேன். அதன் ஒவ்வொரு பதிப்பிலும், நூற்றுக்கணக்கான புதிய தமிழ்ச்சொற்களை ஆக்கி அறிமுகப்படுத்திக் கொண்டே இருந்தார்.

தரமான அந்த இதழ் நிறுத்தப்பட்ட பிறகு, கலைச்சொற்கள் ஆக்கும் பணியில் முழுக்கவனத்தையும் செலுத்தினார். தனி ஒரு மனிதனாக எட்டு கலைச் சொற்கள் அகராதிகளை வெளியிட்டுச் சாதனை படைத்தார்.

‘இஸ்லாமும் சமய நல்லிணக்கமும்’ என்ற இவரது நூல் தமிழக அரசின் வளர்ச்சித் துறையின் சிறந்த நூல் விருதை வென்றது.

இவரது அரும்பணிகளைப் பாராட்டித் தமிழக அரசு கலைமாமணி விருது அளித்துச் சிறப்பித்தது.

மணவை முஸ்தபா அவர்களுடைய இல்லத்திற்கு மூன்று முறை சென்று சந்தித்து உரையாடி மகிழ்ந்து இருக்கின்றேன்.

அன்னாரது மறைவு எனக்கு மட்டும் அல்ல; தமிழ் கூறும் நல்லுலகிற்கே பேரிழப்பு.

அவரது மறைவால் துயருறும் உற்றார்,உறவினர்கள், நண்பர்கள், அனைவருக்கும் என் ஆழ்ந்த இரங்கலைத் தெரிவித்துக் கொள்கின்றேன்.