இரங்கல்

நாட்டுப்புறவியல் எழுத்தாளர் கழனியூரன் மறைவு

திருநெல்வேலி மாவாட்டம் கழுநீர்குளம் என்ற கிராமத்தைச் சேர்ந்த நாட்டுப்புறவியல் எழுத்தாளர் கழனியூரன், சென்னையில் இன்று காலமானார். உடல்நலக் குறைவு காரணமாக மருத்துவமனையில் அனுமதிக்கப்பட்டிருந்த கழனியூரன், சிகிச்சை பலினின்றி இறந்தார். சொந்த ஊருக்கு கொண்டு செல்லப்படும் அவருடைய உடல், நாளை நல்லடக்கம் செய்யப்படவிருக்கிறது.

பள்ளி ஆசிரியாக பணியாற்றி ஓய்வு பெற்ற கழனியூரனி இயற்பெயர் எம்.எஸ்.அப்துல்காதர். திருநெல்வேலி மாவட்டத்தின் நாட்டார் வழக்காறுகள், நாட்டுப்புறக் கதைகள் என தொகுத்து 40-க்கும் அதிகமான நூல்களாக கொண்டுவந்துள்ளார்.

அவருக்கு சமூக ஊடகங்களில் செலுத்தப்பட்ட அஞ்சலிகளின் தொகுப்பு…

கவிஞர், பதிப்பாளர் மனுஷ்யபுத்திரன்:

நாட்டுப்புற ஆய்வாளரும் எனது நீண்ட நாள் நண்பருமான கழனியூரன் இன்று காலை மறைந்தார் என்ற துயரமான செய்தி சற்றுமுன் கிடைத்தது. நாட்டார் கதைகளை சேகரிப்பதில் கிராவுடன் இணைந்து அவர் ஆற்றிய பணிகள் மகத்தானவை. உயிர்மை அவரது பல நூல்களை பதிப்பித்திருக்கிறது. இன்னும் இரண்டு நூல்கள் வரவிருக்கின்றன. நேற்று மாலை அவருடன் தொலைபேசியில் அந்த நூல்கள் தொடர்பாக பேசிக்கொண்டிருந்தேன். இன்று அவர் இல்லை. தனிப்பட்ட முறையில் என்மீது மிகுந்த அன்பும் அக்கறையும் கொண்டிருந்த ஒரு மனிதரை இழந்துவிட்டேன். சற்று முன் தான் உயிர்மையில் அவர் எழுதிவரும் கி.ரா குறித்த தொடரின் அத்தியாயத்தின் இறுதி மெய்ப்பை பார்த்துக்கொண்டிருந்தேன். அதுவே இறுதி அத்தியாயம். இனி அந்தத் தொடர் வராது.

ஊடகவியலாளர் தயாளன்:

கழனீயூரன் மறைவு செய்தி அதிர்ச்சியாக இருக்கிறது. நாட்டார் வழக்காற்றியல் துறைக்கு பேரிழப்பு. அவர் எங்களின் குடும்ப நண்பராக இருந்தார். தென்காசி திருவள்ளுவர் கழகத்தின் முக்கியமானவர்களில் ஒருவர். யாதும் ஊரே: தென்காசி நிகழ்ச்சிக்காக ஒரு மணி நேரம் எங்களோடு உரையாடினார். தென்காசி, நெல்லை வட்டார வழக்குகள், கதைகள் சொலவடைகள் குறித்து அற்புதமாக பதிவு செய்திருந்தார். ஆழ்ந்த இரங்கல்.

 

எழுத்தாளர் கார்த்திக் புகழேந்தி:

கரிசல் நாட்டார் கதைகள், வட்டார மொழி வழக்கு, வசவுகள், விடுகதைகள், தமிழ் தெலுங்கு சொலவடைகள் என்று தேடித்தேடிச் சேகரித்தவர் கழனியூரன். கி.ராவின் அத்யந்த சீடனாகவே தன் வாழ்நாள் முழுக்கவும் செயலாற்றியவர்.

உடல்நலப் பாதிப்புகளுக்குப் பிறகு, களப்பணிகளைச் சுருக்கிக் கொண்டாலும் சிகிச்சைகளுக்காக சென்னைக்கும், ஓய்வுக்காக கழுநீர்குளத்துக்கும் சென்று வந்துகொண்டிருந்த இடைவெளிகளும் கூட, ஒரு தேனியைப் போல தன்னுடைய துறைசார்ந்த தேடல்களை பதிவுகளாக்குவதில் அவர் ஓய்ந்ததே இல்லை. நாட்டுப்புற கதைக் களஞ்சியம் தொடங்கி, வசவுச் சொற்கள் சேகரிப்பு வரைக்கும் கி.ரா தனக்கிட்ட ஒவ்வொரு பணிகளையும் தன் சிரமேற்று செய்துமுடித்தவர் கழனியூரன்.

என்ன நன்மை செய்தேனென்று தெரியாது என் வாழ்வில் பெருவதற்கரிய பல நல்வாய்ப்புகளையும், மாற்றங்களையும் ஏற்படுத்தித் தந்தவர் கழனியூரன். கதைசொல்லியில் பணியாற்றின காலத்தில் ஒரு தேர்ந்த பொறுப்பாசிரியராக என்னை வழிநடத்தினதோடு, நாட்டுப்புறத் தேடல்களிலும் என்னை ஊக்குவித்தவர் கழனியூரனே!

கீராவின் 95ம் வயதில் அவரை கௌரவிக்கும் முயற்சியாக, “கி.ரா-95” நூலினை உருவாக்கும் பொறுப்புக்களை என்னிடம் ஒப்படைத்ததோடு, அந்தப் பணிகள் ஒவ்வொன்றிலும் தனித்த ஈடுபாட்டோடு கவனம் செலுத்தினார். அதேயளவு அக்கறையை என் சொந்த வாழ்க்கையின் மீதும் செலுத்தினவர்.

இந்தப் பெண்ணைத்தான் திருமணம் செய்துகொள்ள இருக்கிறேன் ஐயா, என்று முதல்முதலில் கழனியூரன் முன்னாள் தான் போய் நின்றேன். எங்கள் இரண்டு பேரையும் கனிவோடு உபசரித்து, உணவு பரிமாறி, ஆசீர்வாதம் பண்ணி வழியனுப்பினார்.

கடைசியாக ஐந்து நாட்கள் முன்பு கழனியூரனிடமிருந்து வந்த கடிதம் வந்திருந்தது. என் வாழ்நாளில் எனக்கு அதிக கடிதங்கள் வந்தது அவரிடமிருந்துதான் என்றே நினைக்கிறேன். கிரா-95 நூல் உருவாக்கம் குறித்து எழுதியிருந்தார்.

கூடவே, மனிதர்களின் குணாதிசயங்களை முன்வைத்து, கிராமத்துப் பெரியவர்கள் சொல்லியுள்ள சொலவடைகளைச் சேகரித்து அது தொடர்பாக நூல் ஒன்றை உருவாக்க வேண்டும். அதை நீங்களே வெளியிடுங்கள் என்றும் பணித்திருந்தார்.

எங்களுடைய பதிப்பகத்திற்கு, ‘ஜீவா படைப்பகம்’ என்று பெயர் வைத்ததுமே முதல்முதலில் உச்சிமுகர்ந்து பாராட்டியவர் கழனியூரன் தான். உயிர்மைக்காக கழனியூரன் எழுதிய ‘இலை மறைவு காய் மறைவு’ நூலை திருத்தம் பார்த்து, வடிவமைப்பு முடித்து இறுதிப்படுத்தும் பணிகளுக்காக போன் பேச்சில் அவரோடு கடைசியாக ஓரிருவாரம் முன்புவரைக்கும் தொடர்பிலே இருந்தேன்.

“நீங்கள் கி.ராவை தலைமேலேற்றிக் கொண்டாடினவர், உங்கள் காலத்திலே உங்களது படைப்புகளுக்காக நான் உங்களைக் கொண்டாடுவேன்” என்று அவரை முழுமையாக மூன்றுமணி நேரம் நேர்காணல் செய்து காணொளியாகப் பதிவு பண்ணி வைத்திருக்கிறேன். மிகுந்த ஆசையோடு, இதை என் பேரப் பிள்ளைகளுக்குப் போட்டுக் காட்டவேண்டும் என்று கண் கலங்கினார்.

இன்றைக்கு காலை வந்த செய்திகளின்படி, கழனியூரன் உயிரோடு இல்லை அவர் காலமாகிவிட்டார் என்கிறார்கள். ’காலம்’ ஆனவர் எப்படி உயிரோடு இல்லாமல் இருக்க முடியும். என் தந்தை ஸ்தானத்து மனிதர் கழனியூரன். நெல்லை கிருஷியிடம் இதைச் சொன்னபோது, நீங்கள் சொல்லும் இந்த வார்த்தைக்கு முற்றிலும் தகுதியான மனிதர் தான் அவர் என்றார்.

கழனியூரன் எனக்குச் சொன்ன ஒவ்வொரு சொல்லிலும், அவருடைய ஒவ்வொரு கதைகளுலும், அதைச் சேகரித்த அனுபவங்களைக் கதை கதையார் பகிர்ந்துகொண்ட நினைவுகளிலும், கி.ராவுக்குப் பிறகு எழுத்து முயற்சிகளில் என்னிடம் காட்டிய அன்பிலும், பரிவிலும் அவர் நிலைத்தே இருக்கிறார்.

நாளை கழுநீர்குளத்தில் நடைபெற இருக்கும் அன்னாரின் இறுதிச் சடங்கு நிகழ்வில் கலந்துக்கொள்ள இன்று மாலை திருநெல்வேலிக்குப் புறப்படுகிறேன்.

 

 

Advertisements

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s