உரையாடல்

“கேரளாவில் தடைசெய்யப்பட்ட பூச்சிக்கொல்லிகள்கூட தமிழ்நாட்டில் விற்பனை செய்யப்படுகின்றன !”: வேளாண் செயல்பாட்டாளர் க.சரவணன்

உலகில் தடைசெய்யப்பட்ட பல பூச்சிக்கொல்லி மருத்துகள் இந்தியாவில் விற்பனை செய்யப்படுகின்றன. கேரளா அரசு கூட மோனோகுரோட்டோபாஸ் போன்ற சில பூச்சிக் கொல்லிகளைத் தடை செய்துள்ளது. ஆனால் தமிழக அரசு மௌனம் காப்பது ஏன்?

விகடனின் மாணவப் பத்திரிக்கையாளராக தன் வாழ்வைத் தொடங்கிய க.சரவணன், PUCL- ன் மாநில இணைச் செயலாளராகவும், அகில இந்திய விவசாயிகள் போராட்ட ஒருங்கிணைப்புக் குழுவின் மாநிலச் செயலாளராகவும் உள்ளார். பாமரர் ஆட்சியியல் கூடம்( Barefoot Academy of Governance) என்ற அமைப்பின் மூலமாக பெரம்பலூரில் பணி புரிந்துவருகிறார். நீர் மேலாண்மை, சிறுதானிய உற்பத்தி, விவசாயிகள் தற்சார்பு குறித்து இந்த நேர்காணலில் கூறுகிறார். முகமறியா வீரராகப் பணிபுரிந்து வரும் இவரை தடைம்ஸ்தமிழிற்காக நேர்காணல் செய்தவர் பீட்டர் துரைராஜ்.

கேள்வி:வேதியியல் பொறியியலுக்குப் படித்த நீங்கள் எப்படி பொது வாழ்க்கைக்கு வந்தீர்கள்?

பதில்: எனக்கு சொந்த ஊர் செய்யாறு. நாங்கள் கல்லூரி மாணவர்களாக இருந்த போது பாரதி இளைஞர் சங்கம் என்ற அமைப்பை உருவாக்கி கோவில் சுத்தம் செய்வது , ரத்த தானம் செய்வது, நூலகச் சீரமைப்பிற்கு உடல் உழைப்புச் செய்வது , +2 படிக்கும் மாணவர்களுக்கு வழி காட்டுவது போன்ற பணிகளைச் செய்து வந்தோம்.வேலூர் பொறியியல் கல்லூரியில் இறுதி ஆண்டு படிக்கும் போது விகடன் மாணவர் பத்திரிக்கையாளர் திட்டத்தில் தேர்ந்து எடுக்கப்பட்டேன். அது எனக்கு ஒரு பரந்த பார்வையைக் கொடுத்தது. பின்னர் 2008ல் மக்கள் சிவில் உரிமைக் கழகத்தில்(PUCL) தன்னார்வலராக பணி புரிய ஆரம்பித்தேன். இது எனக்கு சமூக, அரசியல் புரிதலையும், மனித உரிமைகள் பிரச்னைகள் பற்றிய தெளிவான பார்வையையும் கொடுத்தது. பாமரர் ஆட்சியியல் கூடம், ஆட்சியியல் பற்றி ஒரு புரிதலைக் கொடுத்தது. PUCL ல் இணைந்து பணிபுரியத் தொடங்கிய பிறகு அரசுப் பணிக்கு போக வேண்டும் என்று தோன்றவில்லை. அதுவரை மூன்று முறை சிவில் சர்வீசில் சேர தேர்வு எழுதியிருந்தேன். தொடர்ந்து தேர்வு எழுதவும் தோன்றவில்லை.

கே: நீர் மேலாண்மை பற்றி பேசி, எழுதி வருகிறீர்கள்? இதற்கு ஏதும் குறிப்பான காரணங்கள் இருக்கிறதா?

பதில்: முன்னாள் தேர்தல் ஆணையர் டி.என்.சேஷன் அவர்களால் பூனாவில் நடத்தப்பட்ட ஒரு நிறுவனத்தில் ஆட்சியியல் குறித்து ஒரு பட்டயப்படிப்பு ( PG Diploma Master’s Program in Government) படித்தேன். அந்தப் படிப்பின் ஒரு பகுதியாக ராஜஸ்தான் மாநிலத்தில் தண்ணீர் மனிதர் (Water man) என்று அழைக்கப்படுகிற ராஜேந்திர சிங்கைச் சந்தித்தேன். இவர் பெருமைக்குரிய , நோபல் பரிசுக்கு இணையான ‘ ஸ்டாக்ஹோம் விருது’ பெற்றவர். பல நீர்நிலைகளை மக்கள் பங்கேற்போடு பயன்பாட்டிற்கு கொண்டு வந்தவர். இவரோடு நான்கு மாதங்கள் உடனிருந்து பணியாற்றினேன்.என்னை அவரோடு கூடவே பணி புரியச் சொன்னார். ஆனால் வீட்டில் எனக்கு வேறு சில பொறுப்புக்கள்; காதல் திருமணம் போன்ற காரணங்களால் சென்னை திரும்பி விட்டேன். ஆனால் அவர் என் மீது செலுத்திய தாக்கத்தின் காரணமாக நீர்நிலைகள் குறித்து கவனம் செலுத்த ஆரம்பித்தேன்.

செயல்பாட்டாளர் க. சரவணன்

கே: பியூசிஎல்( PUCL) மாநில இணைச் செயலாளராக இருந்து வருகிறீர்கள். இந்தப் பணிக்கு எப்படி வந்தீர்கள்?

பதில்: ராஜஸ்தானில் இருந்து திரும்பிய பிறகு பியூசிஎல்(People’s Union of Civil Liberties) – ஐச் சார்ந்த வி.சுரேஷைச் சந்தித்தேன். அவர் நீர்வளம் குறித்து பல ஆராய்ச்சி செய்து இருக்கிறார். அதே போல MIDS(Madras Institute of Development Studies) ஐச் சார்ந்த ஜனகராஜூம் நீர்வளம் குறித்து ஆராய்ச்சி செய்து இருந்தார். நீர் ஆய்வுகளுக்காக சுரேஷுடன் பணிபுரியத் தொடங்கிய நான் பியூசிஎலில்லும் பணிபுரிய ஆரம்பித்தேன். இது எனக்கு அரசியல் முதிர்ச்சியைக் கொடுத்தது. பியூசில் அமைப்பில் கடந்த பத்தாண்டில் பெரும் அனுபவம் கிடைத்துள்ளது. மாநகர ஏழைகளின் வாழ்வு அவலமானது. காலா படத்தில் வருவது போல, பெரிய ஆக்கிரமிப்புகளை அரசு கைவைப்பது இல்லை.ஆனால் சென்னை மாநகராட்சி குடிசைவாசிகளை அப்புறப்படுத்தியது.இதுகுறித்து அமைக்கப்பட்ட உண்மையறியும் குழுவில் சுரேஷ், பாடம் நாராயணன், பேரா. சண்முக வேலாயுதம், வெனசா பீட்டர், சுந்தர், போன்றோர் இருந்தனர்.அவர்களோடு நானும் பணிபுரிந்தேன். நாங்கள் செம்மஞ்சேரி, கண்ணகி நகர் போன்ற பகுதிகளை ஆய்வு செய்து விரிவான அறிக்கைக் கொடுத்தோம். அதே போல பாலாறு , அதன் கிளை ஆறான செய்யாறு இவற்றில் நடைபெறும் மணற்கொள்ளை தொடர்பாக PUCL உண்மையறியும் குழு மூலம் அறிக்கை கொடுத்தோம். பேரா. சரஸ்வதி, பேரா. சுதிர், பேரா. சங்கரலிங்கம் மற்றும் அண்ணா பல்கலைக் கழக மாணவர்களுடன் நானும் இந்த ஆய்வுக் குழுவில் இருந்தேன். அறிக்கை வெளிவந்தபின், மாவட்ட ஆட்சியர் உட்பட ஏழு பேரை ஜெயலலிதா தற்காலிக பணி நீக்கம் செய்தார். இது தவிர கொள்கை ஆய்வு(policy research), உணவு உரிமை தொடர்பாகவும் சென்னையை ஒட்டி பணிபுரிந்து இருக்கிறேன்.

கேள்வி: உங்களது சொந்த ஊரான செய்யாறை விட்டு விட்டு பெரம்பலூர் மாவட்டத்தில் பணிபுரிகிறீர்களே ஏன்?

பதில்: நாங்கள் பாமரர் ஆட்சியியல் கூடம் (Barefoot Academy of Governance) என்ற அமைப்பின் மூலமாகச் செயல்பட்டு வருகிறோம். பியூசிஎல் வி.சுரேஷ், வன உரிமைச் சட்ட உருவாக்கத்தில் முக்கிய பங்கு வகித்த பிரதீப் பிரபு, ரகு அனந்தநாராயணன் போன்றோர் இந்த அமைப்பு உருவாக காரணமாக இருந்தனர். தமிழ்நாட்டின் பின் தங்கிய மாவட்டம் பெரம்பலூர்; அதில் பின் தங்கிய ஒன்றியம் – வேப்பூர் . எனவே இந்தப் பகுதியை தேர்ந்து எடுத்து வேலை செய்கிறோம். மாநில திட்டக் கமிஷன் கேட்டுக் கொண்டதற்கிணங்க, ஒரு மாதிரி ஐந்தாண்டு திட்ட அறிக்கையை இந்த வேப்பூர் ஒன்றியத்திற்காக தயாரித்து தமிழக அரசுக்கு கொடுத்து உள்ளோம். அதில் நீராதாரம், விவசாயத்திற்கு கடன், விவசாயம் சார்ந்த வேலைவாய்ப்பு, மரபணு மாற்றம் செய்யப்பட்ட பருத்திக்கு பதிலாக சிறு தானிய விவசாயம் போன்ற அம்சங்கள் உள்ளன. இந்த அறிக்கைக்குப் பின், களத்திலும் இறங்கி செயல்படத் தொடங்கினோம். இதற்கு UNDP (United Nations Development Programme ) போன்ற அமைப்புக்கள் உதவி செய்துள்ளன. மக்களிடம் வெளிப்படையாக இருப்பதால் அவர்கள் நம்புகிறார்கள்.கூட்டங்கள் , பயிற்சிப் பட்டறை வாயிலாக விவசாயிகளை வேளாண்மை மற்றும் நீர் ஆட்சியலை கையிலெடுக்கத் தயார்படுத்தி வருகிறோம்.

கேள்வி: மரபணுமாற்றம் செய்யப்பட்ட பிடி வகை பருத்தி உற்பத்திக்கு எதிராக பேசி, எழுதி வருகிறீர்கள்?

பதில்: பருவநிலை மாற்றத்தால் அதிகம் பாதிக்கப்பட்ட மாவட்டங்களில் இந்தியாவில் பெரம்பலூர் மாவட்டம் 28 வது இடத்தில் இருக்கிறது.தமிழகத்தில் முதலிடத்தில் இருக்கிறது. எனவே மழை பொழிவு மாறிக்கொண்டே இருக்கும். மழை குறைவு. பருவநிலை மாற்ற பாதிப்பு அதிகமிருக்கும் பெரம்பலூர் மாவட்டத்திற்கு சிறுதானியங்கள் போன்ற வறட்சியைத் தாங்கும் பயிர்கள்தான் உகந்தவை.ஆனால் இந்தப் பருத்திக்கு அதிகம் நீர் வேண்டும்.இந்தப் மரபணு மாற்றம் செய்யப்பட்ட பி.டி பருத்தியை ‘ இளஞ்சிவப்பு காய் புழு’ தாக்காது என்று விளம்பரம் செய்தார்கள். ஆனால் தாக்குகிறது. இதற்கு பூச்சிக்கொல்லி மருந்தை அடித்ததினால் கடந்த ஆண்டு மட்டும் தமிழகத்தில் 9 பேர் இறந்து போனார்கள். அதில் 5 பேர் பெரம்பலூர் மாவட்டத்தினர். ஆனால் அரசு இரண்டு பேருக்கு மட்டுமே நட்ட ஈடு கொடுத்தது. இது தவிர நூற்றுக்கும் மேற்பட்டோர் மருத்துவமனையில் அனுமதிக்கப்பட்டனர். எனவே இது குறித்து ஆய்வு நடத்த வேண்டும் என்று மாவட்ட ஆட்சியரிடமும், விவசாயத்துறை இணை இயக்குநரிடமும் வேண்டுகோள் வைத்தோம்.ஆனால் அவர்கள் கண்டு கொள்ளவில்லை. அதுமட்டுமின்றி விதையை ஒவ்வொரு வருடமும் கம்பெனிகளிடமிருந்தே வாங்க வேண்டும். அதுதவிர உரமும், ஏராளமான பூச்சிக் கொல்லியும் பிடிபருத்திக்குத் தேவை. எனவே விதை,பூச்சிக்கொல்லி, உரம் இதை வாங்குவதிலேயே விவசாயி ஓட்டாண்டி ஆகிவிடுவார். இது பன்னாட்டு நிறுவனங்கள் நடத்தும், கோடிக்கணக்கான ரூபாய்கள் புழங்கும் தொழில்; எனவே அரசு கண்டு கொள்வதில்லை. உலகில் தடைசெய்யப்பட்ட பல பூச்சிக்கொல்லி மருத்துகள் இந்தியாவில் விற்பனை செய்யப்படுகின்றன. கேரளா அரசு கூட மோனோகுரோட்டோபாஸ் போன்ற சில பூச்சிக் கொல்லிகளைத் தடை செய்துள்ளது. ஆனால் தமிழக அரசு மௌனம் காப்பது ஏன்?

கேள்வி: “இலாபம் தரும் விவசாயம்” என்று கூறி வருகிறீர்களே? இது சாத்தியமா?

பதில்: அதிகம் நீர் தேவைப்படும் உரம், பூச்சிக்கொல்லி மருந்துகளை அரசும், விவசாயப் பல்கலைக் கழகங்களும் விவசாயிகளிடம் கொண்டு சேர்த்துவிட்டன. பசுமைப் புரட்சி விவசாயிகளின் தற்சார்பை உடைத்துவிட்டது.நம்மாழ்வார் ஆற்றிய பணியினால் தமிழ்நாட்டில் இயற்கை விவசாயம் சத்தமில்லாத ஒரு புரட்சியாக நடந்து வருகிறது. இதில் நாம் மற்ற மாநிலங்களை விட முன்னோடியாக இருக்கிறோம்.இந்த இயற்கை விவசாயத்திற்கும் சான்றுபெறுவது அவசியம் என்று ஜூலை முதல் கட்டாயமாக்க இருக்கிறார்கள். இது நல்லதல்ல. வளர்ந்துவருகிற ஒரு துறையை கட்டுப்படுத்தும் முயற்சியாகத்தான் இதைப் பார்க்கிறேன். வரகு, குதிரைவாலி, இருங்குச் சோளம் (காக்கா சோளம்), தினை, சாமை, பனிவரகு போன்ற போன்ற சிறு தானியங்களை பெரம்பலூர் மாவட்டத்தில் விவசாயம் செய்ய ஊக்குவித்து வருகிறோம். இதற்கு தண்ணீர் அதிகம் தேவை இல்லை; இவற்றின் தழையே தீவனமாக மாறுகிறது. விவசாயிகள் தங்கள் நுகர்வுக்கும் சிறுதானியங்களைப் பயன்படுத்துகிறார்கள். பெரம்பலூரில் வேப்பூர் ஒன்றியத்தில் மட்டும் கடந்த இரண்டு சீசனில் 40 டன் அளவுக்கு சிறு தானியங்களை விவசாயிகள் உற்பத்தி செய்துள்ளார்கள்.தங்கள் ஒருங்கிணைப்பின் மூலம் விவசாயிகளுக்கு பேரசக்தி அதிகரித்து உள்ளது. உற்பத்தி செய்த இடத்திலேயே நேரடியாக விற்பனை செய்யப்படுகிறது. இதனால் இடைத்தரகர்கள் தலையீட்டை குறைக்க முடிகிறது. பெரம்பலூரில் சந்தை விலையை விட அதிக லாபம் சிறுதானிய விவசாயிகளுக்கு கிடைக்கிறது.

கேள்வி: மக்கள் பங்கேற்புடன் ஏரிகளை மீட்டெடுக்கும் பணி புரிந்து வருகிறீர்கள். இதுபற்றி உங்கள் அனுபவங்களை கொஞ்சம் சொல்லுங்களேன்?

பதில்: தமிழ்நாடு முழவதும் 39,202 ஏரிகள் உள்ளன. இதனை முன்னர் விவசாயிகளும், பொதுமக்களும்தான் பராமரித்து வந்தார்கள். அப்போது அவைகளின் மீது அவர்களுக்கு உரிமை இருந்தது. பிரிட்டிஷ் ஆட்சி முறை பொதுப்பணித் துறை மூலம் நீர்நிலைகளைக் கட்டுப்படுத்த ஆரம்பித்தது. சுதந்தரத்திற்குப் பின்பும், அரசின் கொள்கைகளால் விவசாயிகள் நீர்நிலைகளிலிருந்து அந்நியமாகிவிட்டனர். நீர்நிலைகள் கிராமசபை வசம், விவசாயிகள் வசம், பொது மக்கள் வசம் இருக்க வேண்டும். புதுக்கோட்டை மாவட்டத்தில் 35 ஆண்டுகளாக பரம்பூர் ஏரியை அங்குள்ள பரம்பக் கண்மாய் பாசன விவசாயிகள் சங்கம்தான் வெற்றிகரமாக பராமரித்து வருகிறது.

பெரம்பலூரில் வேப்பூர் ஒன்றியத்தில் வெள்ளாறு, சின்னாறு என்ற ஆறுகள் இருக்கின்றன. இவற்றுக்கிடையில் 10 ஏரிகள் உள்ளன. அங்குள்ள வடக்கலூர் ஏரி, வடக்கலூர் அகரம் என்ற ஏரிகளின் முக்கிய வரத்து வாய்க்காலைகளை , 2016 ஆண்டு அங்குள்ள விவசாயிகளை வைத்தே தூர்வார வைத்து பயன்பாட்டுக்கு கொண்டு வந்தோம். 539 விவசாயிகள் தலா ஏக்கருக்கு 150 ரூபாய் கொடுத்து இதனைச் சாதித்தனர். கடந்த ஆண்டு பொழிந்த மழையில் ஏரி நிரம்பியது. ஏரிகளை தங்களது ஏரி என விவசாயிகள் புரிந்துகொள்ளத் தொடங்கியுள்ளனர். இது போன்ற மக்கள் பங்கேற்புடன் நீர்மேலாண்மை செய்யும் பணிகள் தமிழகம் முழுவதும் விரிவாக்கப்பட வேண்டும். இப்போது எடப்பாடி அரசு கொண்டுவத்திருக்கிற 10 லட்சத்திற்கு கீழேயுள்ள குடிமராமத்துப் பணிகளை விவசாய அமைப்புகள் மூலம் செய்ய வேண்டும் என்பது அவரது பிரியமான திட்டம். ஆனால் நடைமுறையில் ஆளுங்கட்சியைச் சார்ந்த ஒப்பந்தக்காரர்களே லாபம் அடைகின்றனர்.

கேள்வி: அகில இந்திய விவசாயிகள் போராட்ட ஒருங்கிணைப்புக்குழுவின் மாநில செயலாளராக இருக்கிறீர்கள்?

பதில்: கடந்த ஆண்டு மத்தியப்பிரதேசத்தில் நடந்த போராட்டத்தில் ஐந்து விவசாயிகள் துப்பாக்கிச் சூட்டில் இறந்து போனார்கள். சமீபத்தில் மகாராட்டிராவில் நடந்து பேரணியை நீங்கள் அறிந்து இருப்பீர்கள். விவசாயிகள் போராட்டம் எங்கும் நடைபெறுகிறது. விவசாயிகள் தாங்கள் செய்யும் செலவுகளை ஆவணப்படுத்துவது இல்லை. தங்கள் உழைப்பிற்கான ஊதியத்தை எடுத்துக் கொள்வதும் இல்லை; நிலமதிப்பை கணக்கில் கொள்வது இல்லை. உற்பத்தியாகும் பொருளுக்கு அவர்கள் விலை நிர்ணயம் செய்வது இல்லை. கடந்த ஆண்டு 190க்கும் மேற்பட்ட விவசாய அமைப்புகள் ஒன்று சேர்ந்து அகில இந்திய விவசாயிகள் போராட்ட ஒருங்கிணைப்புக்குழுவை(AIKSSCC) உருவாக்கினார்கள். அதன் தமிழகப் பிரிவுக்கு நான் தற்காலிகமாக செயலாளராக இருக்கிறேன். விவசாயத்திற்கு ஆகும் செலவைவிட 50 சதம் லாபம் வைத்து விளைபொருளுக்கு விலை நிர்ணயம் செய்யக் கோரியும், கடனிலிருந்து விடுதலை கோரியும் எங்கள் அமைப்பு இரு மசோதாக்களை உருவாக்கி இருக்கிறது. இதற்கு 20க்கும் மேற்பட்ட பாஜக உட்பட 20க்கும் மேற்பட்ட கட்சிகள் ஆதரவு அளித்து உள்ளன. இது அமலாகும் சாத்தியம் இருக்கிறது; பார்ப்போம்.

கேள்வி : பசுமை விகடனில் தொடர்ந்து எழுதி வருகிறீர்கள்?

பதில்: என்னைப் பொறுத்தவரை இப்படி எழுதுவதும் ஒரு சமூகப் பணிதான். நீர் மேலாண்மை, பருவநிலை மாற்றம், வேளாண்மை போன்றவை குறித்து எழுதி வருகிறேன்.

தருமபுரியில் ‘சிட்டிலிங்கி’ என்ற கிராமத்தில் 500 பேர் சேர்ந்து இயற்கை விவசாயத்தை வெற்றிகரமாக செய்து வருகிறார்கள். இதனால் வேலையில்லாமல் கிராமத்தை விட்டு இடம் பெயர்ந்தவர்கள் கூட கிராமத்திற்கு திரும்பி வந்தார்கள். இது குறித்து தொடர் கட்டுரைகள் எழுதினேன். இதற்கு நல்ல வரவேற்பு கிடைத்தது. நீர் மேலாண்மையில் சிறந்து விளங்கும் மகாராஷ்டிராவின் ஹிவரே பசார், தண்ணீர் மனிதர் ராஜேந்திர சிங் பற்றியும் தொடர் கட்டுரைகளை பசுமை விகடனில் எழுதினேன். ரீஸ்டோர் அனந்து மற்றும் பேரா. சுல்தான் இஸ்மாயில் ஆகியோரின் தொடர்களையும் தொகுத்து எழுதி வருகிறேன்.

கேள்வி: நீங்கள் என்னவாக அறியப்பட வேண்டும் என்று நினைக்கிறீர்கள்?

பதில்: அம்மா ஓய்வு பெற்ற தலைமை ஆசிரியர். எனது மனைவியும் ஆசிரியை. இரண்டு மகள்கள் உள்ளனர். இவர்களின் ஒத்துழைப்பு இல்லாமல் சமூகப்பணி சாத்தியமில்லை. 16 ஆண்டுகளாக21 வயதிலிருந்தே பொதுவாழ்வில் இருக்கிறேன். எனக்கு வயது இப்போது வயது 37. ‘நான் எனது இலக்கு நோக்கி பயணம் செய்கிறேன்’ என்பதே எனக்கு மகிழ்ச்சி தரும் விஷயம்தான்தான்.

பீட்டர் துரைராஜ், தொழிற்சங்க செயல்பாட்டாளர். டைம்ஸ் தமிழில் நூல்கள் குறித்தும் பல்வேறு துறை சார்ந்த அறிஞர்களின் நேர்காணல்களையும் எழுதிவருகிறார்.

ஜுலை 6-ஆம் தேதி சில தகவல் பிழைகள் திருத்தப்பட்டுள்ளன.

Advertisements

One comment

  1. நேர்காணல் நன்று, ஆளுமை குறித்த ஒரு புள்ளி தொடர் வாசிப்புக்கும் செயல் பாட்டுக்கும் துணைபுரியும்

    Like

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google+ photo

You are commenting using your Google+ account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

w

Connecting to %s

This site uses Akismet to reduce spam. Learn how your comment data is processed.