உரையாடல்

”காந்தி இருந்திருந்தால் சபரிமலையில் பெண்கள் உரிமைக்காக போராடியிருப்பார்”: காந்தியவாதி அண்ணாமலை

social Ego, Political Ego-வின் வெளிப்பாடுதான் 3000 அடி உயர சிலை. அந்தச் சிலை அருகில் சென்றால் பட்டேலின் கால்விரலைத்தான் நாம் பார்க்க முடியும். இது மோசமான பின் விளைவுகளையே ஏற்படுத்தும்.

புதுதில்லி, தேசிய காந்தி அருங்காட்சியகத்தின் இயக்குநராக இருக்கும் அண்ணாமலையுடன் நடந்த நேர்காணல் இது. காந்தி பிறந்த 150 வது ஆண்டை ஒட்டி பல்வேறு நிகழ்வுகள் நாடு முழுவதும் நடக்கும்வகையில் ஒருங்கிணைப்பு பணிகளைச் செய்துவரும் அவரை தி.நகரில் உள்ள காந்தி கல்வி நிலையத்தில் சந்தித்துப் பேசினோம். காந்தியின் இன்றையப் பொருத்தப்பாடு, தூய்மை இந்தியா, மதக் கலவரம், சர்தார் பட்டேல் சிலை என பல விஷயங்கள் குறித்துக் கருத்துகளை நம்மோடு பகிர்ந்து கொண்டார். த டைம்ஸ் தமிழ் டாட் காமிற்காக நேர்காணல் செய்தவர் பீட்டர் துரைராஜ்.

கேள்வி: நீங்கள் புதன்கிழமைதோறும் நடத்திவரும் வாராந்திரக் கூட்டம் பற்றி சொல்லுங்களேன்?

பதில்: எனக்கு முனைவர் பட்டத்திற்கு வழிகாட்டியாக இருந்தவர் டாக்டர். கே.ஜே.சார்லஸ். அவர் கனடா பல்கலைக்கழகத்தில் பொருளாதாரத் துறையில் பேராசிரியராக இருந்தவர். மார்க்சிய சிந்தனைகள் குறித்து முதலில் பத்து வகுப்புகள் எடுத்தார். பின்னர் தத்துவம் குறித்து எடுத்தார். அவர்தான் சொன்னார் ” கூட்டம் என்றால் ஒரு கட்டுப்பாடு இருக்க வேண்டும். யார் வந்தாலும், வராவிட்டாலும் குறிப்பிட்ட நாளில் குறிப்பிட்ட நேரத்தில் தொடங்கிவிட வேண்டும் ” என்பார். காந்தியவாதி என்பதால் நேர ஒழுங்கு என்பது எனக்கு இயல்பானது. கூட்டத்தை மிகச்சரியாக 6.45 மணிக்கு ஆரம்பித்து விடுவோம்; அதே போல மிகச் சரியாக 745 மணிக்கு முடித்து விடுவோம். ஒவ்வொரு புதன்கிழமையும் இங்குள்ள காந்தி கல்வி நிலையத்தில் நடக்கும். இதற்கு ‘புதன் வட்டம்’ என்று பெயரிட்டுள்ளோம்.கூட்டத்திற்கு சராசரியாக 15 முதல் 20 பேர் வரை வருவார்கள் பேசக்கூடிய நூலைப் பொறுத்து, பேச்சாளரைப் பொறுத்து இந்த எண்ணிக்கை கூடும்.காந்தியச் சிந்தனகளை ஒட்டிய புத்தங்கள், படிக்க வேண்டிய நல்ல புத்தகங்கள், கவனம் பெற வேண்டிய மற்ற புத்தகங்கள் குறித்தும் பேசுவோம். 1995 ஆண்டு முதல் நடைபெறுகிறது. பொங்கல், தீபாவளி போன்ற நாட்கள் தவிர எல்லா புதன்கிழமைகளிலும் தவறாமல் நடந்துவருகிறது.

கேள்வி: சுதந்திர இந்தியாவில் காந்தியத்தின் மிக முக்கியமான சாதனை என்று எதனைச் சொல்லுவீர்கள்?

பதில்: காந்தி ஒரு போராசைக்காரர். பல விஷயங்களை அவர் சொல்லி இருக்கிறார். ஆனால் அவரது சாதனைகளில் மிக முக்கியமானது என்று கருதுவது இதைத்தான்:’சாதாரண மனிதன் தன் கருத்தை ஆள்வோரிடம் பேசும் சூழல் வரவேண்டும்’ என்பார். காந்தி விரும்பிய அந்த சூழல் இப்போது இருக்கிறது என்றே நான் கருதுகிறேன்.நீதி மீதான நம்பிக்கை மக்களுக்கு இருக்கிறது. இது காந்தியத்தின் அடிப்படையான வெற்றி என்றே கருதுகிறேன்.தவறு செய்யும் போதெல்லாம் எந்த அரசியல் கட்சியாக இருந்தாலும் பொதுமக்கள் வாக்களித்து அவர்களை நிராகரித்து இருக்கிறார்கள். இவையெல்லாம் காந்தியத்தின் வெற்றிதான்.

கேள்வி: காந்தி பிறந்த குஜராத்தில்தானே மிகப்பெரிய மதக் கலவரம் நடந்தது. இது அவருக்கு தோல்வி இல்லையா?

பதில்: காந்தி தோற்றுவிட்டார் என்று ஒருபோதும் நான் சொல்ல மாட்டேன். நாம்தான் தோற்றுவிட்டோம்.காந்தி குஜராத்தில் பிறந்தாலும் அவருக்கு குஜராத் மக்களைவிட மகாராஷ்டிராவிலும்,பீகாரிலும்,உத்திரப் பிரதேசத்திலும்,தமிழ்நாட்டிலும் உள்ள மக்கள்தான் பெருமளவில் அவரை ஏற்றுக் கொண்டார்கள்.மதக்கலவரங்களுக்கு மதம்தான் காரணம் என்று நாம் சொல்ல முடியாது. தென்னாப்பிரிக்காவில் கூட இங்கிருந்து அங்கு சென்ற இந்தியர்கள் மீது அடக்குமுறை ஏற்பட்டது.அதற்கு காரணம் இந்தியர்களின் உழைப்பு, அதனால் அவர்கள் பெற்ற செல்வம், நிலம் போன்றவை காரணமாக அவர்கள் மீது பொறாமை கொண்டு அவர்கள் மீது அடக்குமுறை நிகழ்ந்தது. இதை காந்தி எழுதியிருக்கிறார்.மதக் கலவரங்களுக்கு பொருளாதார காரணங்கள் முக்கியமாக அமைகின்றன.நம் மதம் மீது நமக்கு நம்பிக்கை இல்லை. அதை சரிவர புரிந்து கொண்டால் மத வெறி ஏன் ஏற்படுகிறது ? மத வெறுப்பு , போட்டி, பெறாமை ஏன் ஏற்படுகிறது?

கேள்வி: நீங்கள் காந்தியவாதியாக எப்படி மாறினீர்கள்?

பதில்: இராணுவத்தில் சேர்ந்து ஒரு அதிகாரியாக பணிபுரிய வேண்டும் என்பதுதான் எனக்கு விருப்பமாக இருந்தது. அதனால்தான் கல்லூரியில் தேசிய மாணவர் படையில் ( NCC) சேர்ந்தேன்.அப்போது இராணுவத்தோடு சேர்ந்து எனக்கு 45 நாட்கள் பயிற்சி கொடுத்தார்கள். அப்போது bayonet training ( துப்பாக்கியுடன் இணைந்திருக்கும் கத்திப் பயிற்சி) கொடுத்தார்கள். அக்கத்தியை வைத்து போர்க்களத்தில் குற்றுயிரும் கொலை உயிருமாக இருக்கும் எதிர்நாட்டு இராணுவ வீரனைக் கொல்ல வேண்டும். ஏனெனில் இறக்கும் தருவாயில் இருப்பவன் அதிக உயிர்களை எடுத்துவிடுவான்.எனவே அவனைக் கொல்ல வேண்டும்.அவனுக்காக ஒரு துப்பாக்கி குண்டை வீணாக்க கூடாது. எனவே அந்த துப்பாக்கி கத்தியால் அந்த வீரனை குத்திக் கொல்ல வேண்டும். இது என் மனதுக்கு ஏற்புடையதாக இல்லை. எனவேதான் வேதியியல் பட்டப்படிப்பு படித்த நான் மதுரை காமராசர் பல்கலைக்கழகம் நடத்திய எம்எஸ்சி( அமைதியாக்கம்- peace making) வகுப்பில் சேர்ந்தேன்.அங்குதான் அந்தப் படிப்பு இருந்தது.பின்னர் M.Phil(காந்தி சிந்தனை) முடித்தேன். காந்தியப் பொருளாதாரத்தில் Phd பெற பதிவு செய்துகொண்டேன். அந்த சமயத்தில்தான் வேலை நிறைய இருக்கிறது வருகிறாயா? ஆனால் சம்பளம்தான் பெரிதாக தர முடியாது என்றார் காந்தி கல்வி நிலையத்தில் இருந்த திருமலை.அப்போது நான் முழுமையாக காந்தியத்தில் ஈடுபாடு கொண்டுவிட்டேன்.எனவே மதுரையில் இருந்து சென்னைக்கு வந்து காந்தி கல்வி நிலையத்தில் பணிபுரிய ஆரம்பித்தேன்.அதுமுதல் காந்தி கருத்துகளைப் பரப்புவதே எனது தலையாய பணி ஆயிற்று.நான் பிஎச்டியை முடிக்கவே இல்லை. எனது வழிகாட்டியாக இருந்த பேராசிரியர் சார்லஸ் ரொம்ப பெருமையாகச் சொன்னார் ” What you are doing is greater than your Phd.!”.

கேள்வி: உங்கள் குடும்பம் பற்றி சொல்லுங்களேன்?

பதில்: என் மனைவி பிரேமா. அவரும் ஒரு காந்தியவாதிதான். என்னைப் போல அல்லாமல் அவர் பிஎச்டியை முடித்து விட்டார். காந்திக்கும் அவர் மனைவி கஸ்தூரிபாயிக்கும் நிலவிய உறவு பற்றி ஆய்வு செய்து பட்டம் பெற்றார்.அவரும் காந்தி கருத்துகளைப் பரப்பி வருகிறார். எனது மகள் வல்லபி . ஐந்தாம் வயது வரை அவரை நாங்கள் காந்தி சொன்னபடி பள்ளிக்கு அனுப்பவில்லை. இந்த காந்தி கல்வி நிலைய சூழலில்தான் நன்கு வளர்ந்தாள். இப்போது இயன்முறை சிகிச்சை(Physiotherapy) இறுதியாண்டு படித்து வருகிறாள்.

கேள்வி: புதுதில்லியில் உள்ள தேசிய அருங்காட்சியகத்தின் இயக்குனராக செயல்படுகிறீர்கள். இது பற்றி?

பதில்: உண்மையில் எனக்கு ரொம்ப பெருமையாக இருக்கிறது.இந்த அருங்காட்சியகம்தான் காந்தி வைத்திருந்த எல்லா பொருட்களுக்கும், அவரது எழுத்துக்களுக்கும் பாதுகாவலர். காந்தி கருத்துகளைப் பரப்ப ஒரு நல்ல வாய்ப்பு;பல புதிய தொடர்புகள் கிடைத்ததுள்ளன.மொழிச்சிக்கல் இருந்தாலும், சென்னையிலிருந்து சென்றாலும் ஊழியர்கள், உறுப்பினர்களின் நன்மதிப்பைப் பெற்றுள்ளேன்.நீங்கள் பேட்டி எடுக்கும் இந்த நாளில் எனது முதலாவது ஐந்தாண்டு பணியை ( I term) நிறைவு செய்து இரண்டாவது ஐந்தாண்டுக்கான பணியை தொடங்கியுள்ளேன்.

கேள்வி: காந்தி பிறந்த 150 ஆண்டு நடைபெற்றுக் கொண்டு இருக்கிறது.இதற்காக நிறைய நிகழ்வுகளை ஒருங்கிணைத்து வருகிறீர்கள். இது தொடர்பாக ஏதும் சொல்ல விரும்புகிறீர்களா?

பதில்: இதை ஒரு வாய்ப்பாக பயன்படுத்திக் கொண்டு இயன்ற வழிகளில் எல்லாம் காந்தி கருத்துகளை பரப்புரை செய்து வருகிறோம்.பல நாட்டு தூதரகங்களை தொடர்பு கொண்டு வருகிறோம். இத்தாலி, பிரான்சு, அமெரிக்கா நாட்டு தூதரகங்களில் நிகழ்வுகள் நடைபெற உள்ளன. பொதுத்துறை நிறுவனங்கள்,ICMR,FICCI போன்ற அமைப்புகளுடன் சேர்ந்து நிகழ்ச்சிகளுக்கு திட்டமிட்டு வருகிறோம். ரயில்வே உடன் இணைந்து கண்காட்சிக்கான ஒரு ரயிலை தனியாக ஏற்பாடு செய்து வருகிறோம். சென்னை விமான நிலையத்தில் ‘காந்தி கார்னர்’ வைத்துள்ளோம் . ஓராண்டு காலத்திற்கு அது இருக்கும். காந்தி கல்வி நிலையம் எப்போதும் தனியாக நிகழ்ச்சிகளை நடத்தாது;மற்ற அமைப்புகளுடன் சேர்ந்து நடத்தும்.பள்ளி, கல்லூரி களில் வினாடி வினா, கண்காட்சி, காந்தி பற்றி ஏ.கே.செட்டியார் எடுத்த ஆவணப்படம் போன்ற நிகழ்வுகளை உள்ளடக்கி நான்கு மணிநேரத்திற்கு ஒரு பேக்கேஜாக தயார் செய்துள்ளோம்.காந்தி குறித்த புகைப்பட கண்காட்சிக்கு ஏற்பாடு செய்துள்ளோம்.இந்திய அரசின் பப்ளிகேஷன் டிவிஷனுடன் இணைந்து புதிய காந்திய நூல்கள், பழைய நூட்களை மறுபதிப்பு செய்தல், பிற மொழிகளிலிருந்து மொழி மாற்றம் செய்யும் நூட்கள் என 150 புத்தகங்களை வெளியிட உள்ளோம்.

கேள்வி: காந்தி இப்போது உயிரோடு இருந்திருந்தால் சபரிமலையில் பெண்களை அனுமதிக்க வேண்டும் என்ற போராட்டத்தை எப்படி பார்த்திருப்பார்?

பதில்: காந்தி எந்தக் கோவிலுக்கும் போனதில்லை. தீண்டத்தகாதவர்களோடு சேர்ந்து அவர்கள் உரிமைகளை நிலைநாட்ட அவர்களுடன் கோவிலுக்குச் சென்றவர் காந்தி்.’எந்தத் தடையும் இல்லாமல் எல்லாரும் கடவுளை தரிசிக்க உரிமை உண்டு’ என்று நம்பியவர் காந்தி. எனவே காந்தி இப்போது உயிரோடு இருந்திருந்தால் சபரிமலையில் பெண்களை அனுமதிக்கக் கோரி போராட்டம் நடத்துவார். வைக்கம் போராட்டம் மூலம் தாழ்த்தப்பட்டோரின் வழிபாட்டு உரிமையை நிலைநாட்டியவர் அல்லவா காந்தி?

கேள்வி: காந்தி பெயரில் ‘ தூய்மை இந்தியா’ திட்டத்தை நரேந்திர மோடி அரசு அமலாக்கி வருவது பற்றி?

பதில்: எல்லாரும் சுத்தமாக இருக்க வேண்டும் என்பது நல்ல விஷயம் தானே! ‘தூய்மையான இந்தியா’ மட்டுமல்ல;’தூய உள்ளம்’ கொண்ட இந்தியா வேண்டும்;’ஊழலற்ற இந்தியா’ வேண்டும்;’ஒழுக்கமான இந்தியா’ வேண்டும். பெரும் பொருட்செலவில் தூய்மை இந்தியா திட்டத்தை மத்திய அரசு அமலாக்கி வருகிறது. இந்தத்திட்டம் பெரிய தோல்வி என்றே நினைக்கிறேன். நிறைய கழிப்பறைகளை கட்டுகிறார்கள்.அதற்கு போதிய தண்ணீர் வசதி செய்யப்பட்டுள்ளதா? இல்லையென்றால் அது குடோனாகத்தான் மாறும். அக்கழிப்பறைகள் நவீனமாக்கப்பட்டுள்ளதா? இதனை பராமரிக்கப் போவது துப்புரவுப் பணியாளர்கள்தானே? அவர்களை துப்புரவுப் பணியையே மீண்டும் செய்ய வைப்பது போல ஆகாதா ! நாளுக்கு நாள் மனிதன் உற்பத்தி செய்யும் திடக்கழிவுகள்(Solid waste) அதிகமாகி வருகிறதே.உற்பத்தி ஆகும் இடத்திலேயே உபயோகம் இருப்பதில்லை; இதனால் பேகிங் மெடீரியல்ஸ் பயன்பாடு அதிகமாகிறது. அந்தப் பொருட்களை நீண்ட நாட்கள் பாதுகாக்க வேதிப் பொருட்களை சேர்க்க நேரிடும். இதனால் அடக்க விலை உயரும். இதன் மூலம் உற்பத்தி ஆகும் குப்பைகளை குறைப்பது பற்றி தூய்மை இந்தியா பேசுகிறதா?

கேள்வி: குஜராத்தில் பட்டேலுக்கு 3000 அடி சிலை வைப்பது பற்றி என்ன நினைக்கிறீர்கள்?

பதில்: சர்தார் பட்டேல் இதை விரும்பியிருப்பாரா என்று தெரியவில்லை. டெல்லியில் போக்குவரத்து நெரிசல் அதிகம். சிறிய கார் போதுமானது. ஆனால் பெரிய கார்தான் மதிப்பு என்று எல்லாரும் பெரிய கார்களையே வைத்து இருப்பார்கள். இதில் ஒரு பெருமை! இது நம்மிடம் உள்ள Social Ego, Political Ego . இதன் வெளிப்பாடுதான் 3000 அடி உயர சிலை. அந்தச்சிலை அருகில் சென்றால் பட்டேலின் கால்விரலைத்தான் நாம் பார்க்க முடியும். இது மோசமான பின் விளைவுகளையே ஏற்படுத்தும். மகாராட்டிராவில் சத்திரபதி சிவாஜி சிலையை இதைவிட பெரிதாக அமைக்கப் போவதாக சொல்லுகிறார்கள். உ.பி.யில் இராமர் சிலையை இதே போல கட்டப் போவதாக சொல்லுகிறார்கள்.

கேள்வி: காந்தியின் 150 வது பிறந்த ஆண்டு விழாவை ஒட்டி அரசு இன்னும் அதிகம் செய்ய வேண்டும் என்று நினைக்கிறீர்களா?

பதில்: காந்தி எப்போதும் அரசுக்குச் சொந்தமானவர் அல்ல.மக்களுக்கு சொந்தமானவர். அரசு செய்வதைச் செய்யட்டும்.எல்லா தரப்பு மக்களிடமும் குறிப்பாக அவரை தவறாக புரிந்து கொண்டவர்களிடம் காந்தியை எடுத்துச் செல்ல வேண்டும். பாகிஸ்தானில் இருந்து இடம்பெயர்ந்த முஸ்லிம்கள் அதிகம் வசிக்கும் ‘மேவாத்’ என்ற இடத்தில் நிகழ்ச்சிகள் நடத்தினோம்.இதே போல சேரிப் பகுதிகளில் நிகழ்ச்சிகள் நடக்க வேண்டும்.காந்தி கல்வி நிலையம் தமிழ்நாட்டின் வட மாவட்டங்களில் நிகழ்ச்சிகள் நடத்த பொறுப்பேற்றுள்ளது;தமிழ்நாடு சர்வோதய மண்டலும், தமிழ்நாடு காந்தி நினைவு நிதியும் தென்மாவட்டங்களில் நிகழ்ச்சிகள் நடத்த பொறுப்பேற்றுள்ளது.காந்தியின் குரல், காந்தி பற்றி ஏ.கே.செட்டியார் எடுத்த ஆவணப்படம், அவரது ஆசிரம வாழ்க்கை, காந்தி எழுதிய, காந்தி குறித்து மற்றவர்கள் எழுதிய 30 அடிப்படையான நூட்களை உள்ளடக்கிய ஒரு பென்டிரைவ் வெளியிட்டுள்ளோம். தமிழ், ஆங்கிலம், இந்தி மொழிகளில் இது கிடைக்கும். இதன் விலை ரூ.300. இதைப் பார்த்தால் காந்தி குறித்த முழுமையான சித்திரம் உங்களுக்கு கிடைத்துவிடும்.

கேள்வி: பூரண மதுவிலக்கு சாத்தியம் என்று நினைக்கிறீர்களா?

பதில்: தமிழ் மக்களின் ஆரோக்கியமான வாழ்வுக்கு பூரண மதுவிலக்கு அவசியம். ஒரு கட்டத்தில் இது சாத்தியம் ஆகும் நிலை வந்தது. திமுக இக்கோரிக்கையை ஏற்றுக் கொண்டது. படிப்படியான மதுவிலக்கிற்கு அதிமுக ஒத்துக் கொண்டது. எல்லா அரசியல் கட்சிகளும் இந்தக் கோரிக்கையை ஏற்றுக் கொண்டன. இந்த நிலை வர தமிழ்நாட்டில் உள்ள காந்திய இயக்கங்கள் முக்கியப் பங்கு வகித்தன.இது முன்னெடுத்துச் செல்லப்பட வேண்டும்.பூரண மதுவிலக்குதான் ஒட்டுமொத்த தமிழகத்திற்கும் நல்லது. மதுவிலக்கை அமலாக்கினால் அவர்களே தொலைக்காட்சி போன்ற பொருட்களை வாங்கிக் கொள்வார்கள். அவர்களின் வாங்கும் சக்தி அதிகரிக்கும்.

கேள்வி: உங்களுடைய இத்தனை ஆண்டு உழைப்பிற்கு போதுமான அங்கீகாரம் கிடைத்து இருக்கிறது என்று நினைக்கிறீர்களா?

பதில்: நான் தவறு இழைத்து விட்டேன் என்று ஒருபோதும் நினைக்கவில்லை. மனதுக்கு நிறைவாக உள்ளது. மிக மகிழ்ச்சியாக இருக்கிறது. நாம் செய்யும் வேலைக்கு அங்கீகாரம் தானாக வரும்; அப்படியே வராது போனாலும் உற்சாகமாக பணியாற்றும் மன உறுதியை நாம் பெற்றுக் கொள்ள வேண்டும்.

பீட்டர் துரைராஜ், தொழிற்சங்க செயல்பாட்டாளர்; த டைம்ஸ் தமிழ் டாட் காமிற்காக பல்வேறு துறை சார்ந்த ஆளுமைகளை நேர்காணல் செய்து எழுதி வருகிறார்.

Advertisements

One comment

  1. அண்ணாமலை அய்யாவுடனான நேர்காணல் சமகால நிகழ்வுடனுமான கேள்வியுடன் அமைந்திருந்த்து சிறப்பு

    Like

மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out /  மாற்று )

Google+ photo

You are commenting using your Google+ account. Log Out /  மாற்று )

Twitter picture

You are commenting using your Twitter account. Log Out /  மாற்று )

Facebook photo

You are commenting using your Facebook account. Log Out /  மாற்று )

Connecting to %s

This site uses Akismet to reduce spam. Learn how your comment data is processed.